ប្រធានាធិបតីអាមេរិក លោកដូណាល់ ត្រាំ ថ្លែងកាលពីថ្ងៃទី៩ កុម្ភៈ ប្រាប់ដល់សមភាគីចិនលោកស៊ី ជីនពីង ថា លោកនឹងគោរពគោលការណ៍ចិនតែមួយពេលជួបសន្ទនាគ្នាតាមទូរស័ព្ទរយៈពេលយ៉ាងយូរមួយ ជាលើកដំបូងរវាងមេដឹកនាំទាំង២ចាប់តាំងពីលោកត្រាំ ចូលកាន់កាប់សេតវិមានមក ។
ក្នុងសេចក្តីប្រកាសមួយ សេតវិមានគូសបញ្ជា់ថា មេដឹកនាំទាំង២ពិភាក្សាគ្នាពីបញ្ហាជាច្រើន ហើយលោកប្រធានាធិបតីត្រាំ ទទួលយល់ព្រមតាមសំណើរបស់លោកស៊ី គោរពគោលការណ៍ចិនតែមួយ ។ លោកត្រាំ និងលោកស៊ី អញ្ជើញគ្នាទៅវិញទៅមក ដើម្បីជួបគ្នាក្នុងប្រទេសរៀងៗខ្លួន ។
សេតវិមានចាត់ទុកការពិភាក្សាគ្នានេះថា ស្និទ្ធស្នាលបំផុត ហើយមេដឹកនាំទាំង២ពិភាក្សាគ្នាជាមួយលទ្ធផលយ៉ាងល្អប្រសើរ ។
ទូរទស្សន៍ចិន CCTV គូសបញ្ជាក់ថា លោកស៊ី អបអរសាទរចំពោះការអះអាងជាថ្មីរបស់លោកត្រាំ ពីការគោរពរបស់រដ្ឋាភិបាលអាមេរិកដល់គោលការណ៍ចិនតែមួយ ។
សេតវិមានកាលពីថ្ងៃទី៨ កុម្ភៈ ប្រកាសថា លោកត្រាំ បានផ្ញើជូនលោកស៊ី នូវសារលិខិតមួយច្បាប់ដែលបង្ហាញពីបំណងរបស់លោកចង់ឱ្យមានទំនាក់ទំនងស្ថាបនាមួយរវាងប្រទេសទាំង២ បន្ទាប់ពីភាពតានតឹងចាប់តាំងពីលោកត្រាំ ជាប់ឆ្នោតមក ៕
No comments:
Post a Comment